ID: 37004 description: Fesiligia e tagata Samoa le moni o le faaupuga, o Niu Sila o la latou uo [ata: foa'i]By LALI STAFFPASEFIKAO le aso Tofi na se’i mavae atu nei, i Samoa (aso Lulu i Amerika Samoa), na feiloai ai taitai o le malo o Niu Sila faapea nisi o le aufaigaluega mai i le ofisa o le Komesina a Niu Sila, ma tagata o Samoa, e silia ma le to’a selau, o lo’o afifio ma papa’a’ao i le itumalo o Siumu ma Safata, lea ua a’afia o latou gataifale ona o le fa’alavelave na tula’i mai ina ua goto le va’a mai Niu Sila, le HMNZS, i le a’au.I lea lava feiloaiga, sa faapea ona fa’ato’ese ai le susuga ia Si’alei Van Toor, le Komesina a Niu Sila i Samoa, i tagata o afioaga o Tafitoala, Sataoa, Lotofaga, Maninoa, Vaie’e, Saanapu, Siumu ma isi o pito nu’u latalata ane, na mafai ona auai i lenei feiloaiga i le aso Tofi i Samoa.O iina na fesiligia ai e nisi o tagata o Siumu ma Safata ia taitai o Niu Sila, po o Niu Sila o sa latou uo, ona o le a’afiaga o soifuaga o tagata talu ai le fa’aleagaina o gataifale, ina ua goto le HMNZS Manawanui i ona a’au.Na fia malamalama tagata o Samoa, po o le a leisi la’asaga o le a laasia e le malo o Niu Sila.O taufusi o Saanapu o taufusi pito ili ona tetele i totonu o Samoa ma ua iai se popolega i tagata o Samoa o le a faapea ona afaina i le suau’u o lo’o liki mai i le va’a na magoto.O le toatele o lo’o fia malamalama i le umi o le a toe fo’i ai a’au i ona tulaga lelei, talu ona fa’aleagaina e le va’a mai i Fuava’a o Niu Sila, ae le gata i lea, o le a’afiaga o tupulaga fai mai, i lenei fa’alavelave.Sa fa’aleoina e le susuga i le Faafeagaiga ia Rev. Feata Perelini mai i le afioaga o Lotofaga, lona faanoanoa tele ona o faamatalaga e faapea, e le o a’afia le gataifale i le suau’u o lo’o liki mai i le va’a. Ma na ta’ua e Rev. Perelini le tele o le afaina o amu o le a’au ona o lenei fa’alavelave na tupu mai.Sa saunoa foi Rev. Perelini, o lenei fa’alavelave e a’afia ai soifuaga o tagata uma o le atunu’u, aemaise i latou o lo’o fa’alagolago i le sami mo le tausiga o latou aiga ma nu’u. Ma o se a’afiaga umi i soifuaga o tagata.Na ta’ua foi e le taitai fa’aleagaga le latalata mai o le vaitaimi e ta ai le palolo, ae o le a le mafai ona ta se palolo i o latou gataifale. Ma sa saunoa Rev. Perelini, o le faaupuga a le Komesina Niu Sila, o Niu Sila o se uo ia Samoa, ua na o ni upu. Ae a o’o mai i tulaga e pei o le tau o Visa, ona si’i lea e Niu Sila ia le totogi ma fesiligia ai e le susuga a le Fa’afeagaiga, po o ni uiga moni ia o se uo.Na saunoa foi Rev. Perelini, i le aumaia o ni tagata o iai ni tomai faapitoa e fesoasoani, ae peitai, e leai se tomai faapitoa i le lalolagi, e mafai ona toe faafoi le siosiomaga i lona tulaga na iai muamua.Sa ta’ua foi e Rev. Perelini e faapea, o le aumaia e nei tagata ia ni vailaau e fofo ai le siosiomaga, ma o le a atili fa’aleagaina ai galuega a le Atua. Ma na ia fesiligia po o le a le umi o le a faia ai nei galuega, aua le a umi ai ona a’afia Siumu ma Safata.Na fesiligia foi e se tasi mai i Maninoa, le susuga ia Su’a Masi ia taitai o Niu Sila po o iai se fuafuaga mo se tupe e tufatufaina i aiga ua a’afia o latou tamaoaiga ona o lenei fa’alavelave faapea ma le umi o le taimi e toe fa’aleleia ai.Sa faapea foi ona fesiligia e se tasi mai i Tafitoala, ia se fuafuaga a Niu Sila, e fesoasoani i aiga o Siumu ma Safata.I le saunoaga a le susuga ia Netina Faleulamalae, lea e ana le Sina PJ Surf Fales, sa ia ta’ua e faapea, ina ua tupu le galulolo i le 2009, sa mauaina e aiga ia fesoasoani tau meataumafa. Ae o le taimi nei, ua na o fa’alifu talo ona ua le mafai ona toe maua mai se i’a i le sami.O seisi mataupu na fa’atula’i mai e se sui mai i Sataoa, o le manogi lea o le suau’u o lo’o manavaina e tagata o lo’o nonofo latalata i le sami. Sa fautuaina e lea sui ia taitai o le malo, ina ia fa’atonuina le mamalu o le atunu’u e alo’ese mai i le ta palolo aua le puipuiga o lo latou soifua maloloina.Na fa’aleoina foi e le afioga i le Faipule o Safata, ia Leaana Ronnie Posini, le faapopoleina o lona loto ona o taufusi fa’asao a lona itumalo faapea ai ma i’a ma figota o le sami ua a’afia, ae o lo’o taumafaina e tagata.Sa ia toe fafagu mai seisi foi fa’alavelave faapea lea na tupu i Toelau i le 30 tausaga ua tuanai, ma na i’u ai lava ina le toe fo’i ‘amu o le a’au, i se lelei. Ma o se atugaluga pito maualuga lea mo lona itumalo.Na fesiligia foi e le afioga i le Faipule ia le moni o faamatalaga o lo’o fa’asalalau ma le iai o se masalosaloga i le o’o mai o Niu Sila, aua o mea o lo’o tutupu mai i nei vaitaimi, o le a a’afia ai le lumanai o le atunu’u.Na saunoa le afioga i le Faipule, e le o mea faigofie lenei mataupu, aua e fai o le manatu alofa atu i le minisita, o le malo o Samoa faapea le malo o Niu Sila, ae o lo’o tele lava se atugaluga o lo’o nonofo ma ona tagata, pe afai ae tupu mai se tulaga, e a’afia ai soifuaga o tagata o le itumalo.O le lona lua ai lea o feiloaiga a nei itumalo ma taitai o malo, a’o fa’aauau pea galuega mo le iloiloina o le a’afiaga o le siosiomaga i lenei fa’alavelave.Section: Le LaliView the discussion thread. Ημερομηνία έκδοσης: 2024-10-20 09:13:23 Αναγνωριστικό πηγής: samoanews ID άρθρου: f7e1972f6b677b1cf6e95a3b6f239dc1 Σύνδεσμος: Διεύθυνση URL βίντεο: Χώρα (The country of the publisher): Σαμόα (samoa (ws)) Γλώσσα (The language of the news article): samoan ()

Κατηγορίες: Υγεία Λέξεις-κλειδιά:

Σχόλιο