Vatnsborð aldrei verið lægra í Rín og Dóná
Vatnsborð stórfljótanna Rínar og Dónár hefur á sumum stöðum aldrei verið lægra. Þjóðverjar ætla að aflétta banni við akstri vörubíla á sunnudögum og frídögum. Hitamet féllu í Slóvakíu og Austurríki. Ógnar hagkerfi landsins Steffen Bilger, innanríkisráðherra Þýskalands, sagði ástandið sérlega erfitt vegna þess hversu geysilega lágt vatnsborðið sé. „Það ógnar hagkerfi landsins og þar með birgðakeðjum okkar. Við getum augljóslega ekki haft áhrif á veðrið en við getum aðstoðað efnahagslífið að þrauka þessar erfiðu vikur. Þess vegna brípum við til mótvægisaðgerða eftir þröfum.“ Mótvægisaðgerðirnar snúast meðal annars um að aflétta banni við akstri vörubíla á sunnudögum og frídögum. Er það gert til að færa umferð frá ám yfir á vegi. Vatnsborð stórfljóta í Evrópu heldur áfram að lækka vegna hitabylgju og mikilla þurrka. Skipsflök úr síðari heimsstyrjöld hafa birst þar sem vatnsborð hefur lækkað mikið. Hagfræðingar og hagsmunasamtök óttast að neikvæðar afleiðingar lágs vatnsborðs í álfunni leiði til samdráttar í hagvexti, svipuðum þeim og varð vegna mikilla þurrka 2018. Vatnsborð Rínar hefur farið niður í sögulegt lágmark á nokkrum stöðum í Þýskalandi og Hollandi. Hitabylgja heldur áfram í að minnsta kosti eina viku í viðbót og búast má við að hitastig fari yfir fjörutíu stig í mörgum ríkjum í Mið- og Suður-Evrópu. Vatnsborð Dónár hefur einnig haldið áfram að lækka og ástandið er sérstaklega slæmt í Norður-Búlgaríu. Íbúar sem búa í bænum Gomotartsi við árbakkann segja ástandið aldrei hafa verið svo slæmt. „Það hefur aldrei verið svona lítið í Dóná. Ég sigldi um Dóná sem skipstjóri í 30 til 40 ár og hef aldrei séð annað eins,“ segir Zhelyazko Stankov, bæjarstjóri. Lyuben Georgiev hefur lengi veitt í ánni. „En þetta hefur aldrei gerst. Það versnar með hverju árinu.“ Ekki í fyrsta skipti sem hitamet féllu Hitamet féllu bæði í Austurríki og Slóvakíu í gær, hitinn fór upp fyrir 40 stig í báðum löndum. Í Slóvakíu féll hitamet annan daginn í röð. Hiti fór mest í 42,2 stig í þorpinu Dolne Plachtince í suðurhluta landsins. Metið í gær var einnig sett í þorpinu þegar hiti mældist 41,4 stig, samkvæmt veðurstofu landsins. Þetta er ekki í fyrsta skipti í sumar sem heitasti dagur ársins mælist. Metið féll tvisvar í Júní. Í Austurríki hefur hitamet einnig fallið tvisvar í þessari viku. Sérfræðingar segja loftslagsbreytingar hafa aukið á þurrka í Evrópu í sumar og að mikill hiti stuðli að einkar heitu loftslagi. Rín og Dóná Rín og Dóná eru meðal stórfljóta Evrópu. Rín á upptök sín í svissnesku Ölpunum og rennur norður meðfram landamærum Liechtenstein og Austurríkis, í gegnum Þýskaland og um Holland og þar til sjávar í Norðursjó. Fljótið hefur alla tíð verið ein mikilvægasta samgönguæð Evrópu. Dóná er næstlengsta fljót Evrópu. Upptök hennar eru í Suður-Þýskalandi og rennur hún í gegnum tíu ríki í Svartahaf. Eins og Rín er Dóná mikilvæg siglingaleið. Skipsflök úr síðari heimsstyrjöldinni skjóta upp kollinum Þegar vatnsborð lækkar eins mikið og nú hefur gerst kemur ýmislegt í ljós. Þýsk skipsflök úr seinni heimsstyrjöldinni birtust til dæmis meðfram árbökkum Dónár á landamærum Serbíu og Rúmeníu. Nasistar sökktu skipunum vísvitandi í lok stríðsins þegar þeir hörfuðu frá Rúmeníu og sovéski herinn sótti lengra inn í Evrópu. Serbnesk yfirvöld hafa lengi beðið Evrópusambandið um aðstoð við að fjarlægja flökin. Talið er að hundruð skipa liggi á botni árinnar, sum enn hlaðin vopnum. Erfitt hefur verið að staðsetja þau nákvæmlega án þess að hreyfa við sprengiefnunum sem gætu verið í þeim. Skipsflökin þrengja að siglingaleiðum um Dóná og því nærri ómögulegt að sigla um ána á sumum stöðum. Krsta Brandic býr í hafnarborginni Prahovo á bökkum Dónár. Hann segir vatnsborðið of lágt og skip ekki lengur komast um ána. „Áin er minna en þriggja metra djúp. Já, þrír metrar niður á botn.“ Skipin laða að sér forvitna ferðamenn sem reyna að fá heimamenn til þess að sigla með sig nær, en það getur reynst erfitt. „Fólk veit ekki enn hvernig hægt er að komast að skipunum. Það er mikill áhugi á þessu en fólk kemst ekki að flökunum,“ segir Ivica Gavrilovic, sem býr í Prahovo.
2026-08-06 23:53:31
Enlaces
Juegos
Busca en la web
Analítica
Correo electrónico / Webmail gratuito
tienda web
subdominio gratis
URL minúscula
ChatGPT
Herramientas
Directorio Web
wiki
Transporte
Agenda
Contactos