Gæsluvarðhaldi hafnað og konunum sleppt
Héraðsdómur hafnaði síðdegis kröfu lögreglunnar á Suðurlandi um gæsluvarðhald yfir tveimur starfsmönnum hjúkrunarheimilis í Vestmannaeyjum vegna rannsóknar á andláti. Heimildir fréttastofu herma að tvær íslenskar konur hafi verið handteknar í tengslum við rannsókn málsins í gær. Jón Gunnar Þórhallsson, yfirlögregluþjónn, staðfestir að þeim hefur nú verið sleppt eftir niðurstöðu héraðsdóms. Til skoðunar er að kæra þá niðurstöðu til Landsréttar.Hin látna var kona á tíræðisaldri. Samkvæmt heimildum fréttastofu var fjölskyldan grunlaus um að andlátið gæti hafa borið að með saknæmum hætti fyrr en lögregla hafði samband.
2026-02-03 16:57:38