E SOLA LE AMIOLEAGA AE TULILOAINA

[ata: SN] By Okalani Etuati VAEGA 22 E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou. Ia ae se’ese’e mai loa i ou se’etaga malu, mo le amataga o le tatou Fagogo Fou – E SOLA LE AMIOLEAGA AE TULILOAINA. **************************************** Na tilotilo mai Lula i le toe fo’i atu o le teine o Selema, i le taavale, ma ia fesili mai, “Ia, o le a se tala a le toeaina?” “Ua ma’imau le ta taimi, na ta o mai ai!” o le faapea atu lea a Selema ma ona foliga le fiafia. “O le a le tala a le toeaina?” o le toe fesili atu lea a Lula. “E leai sana tupe!” o le tali atu a Selema ma faasaga i fafo o le faamalama. Ua fa’aola e Lula le taavale ma solomuli atu i tua, ae na toe fesili atu ia Selema. “O le a le mea lea na ou faalogo atu ai o ‘ava’avau mai le toeaina ia oe?” Ae ua liliu Selema agai i lana faamalama ma faapea mai, “E leai se mea.” Ua alu le mafaufau a Selema, i le faamatalaga a le toeaina, e faapea, o Mikaele, o le tama moni lea a Mareko. Sa matua’i lagona e Selema ia lona fa’anoanoa tele, e tusa ai ma lea faamatalaga, aemaise o le tau o lona mafaufau ia Mikaele ma Lina. Ua tilotilo mai ia Lula ia Selema, ona ia toe fesili atu lea ia Selema. “O fea leisi mea ta te o iai?” “O lea e ta te o e piki mai le alii o Tepa, ona ua misi lona faamasinoga,” o le tali mai a Selema. “O Tepa, ua lata i le 90 tausaga, ae sa molia i lona fiafia e fealua’i telenoa i le alatele.” Sa te’i Selema i le ‘ata leotele a lana paga o Lula. Ae sa avea le ata leotele o Lula ma tulaga na toe ata atu ai ma le teine o Selema. “E a la? Ua lava oe e te alu i le fale?” o le fesili atu lea a Lula ia Selema. Ua paka le taavale a Lula i luma o le fale a Tepa ma ua le oso i fafo, ae na’o na tilotilo mai ia Selema. “Sau ta o!” o le faatonu atu lea a Selema. Ua atili ai ona ata Lula ma savali atu i le faitoto’a, lea ua tu mai ai Selema. Manatua, o Lula, e fai sina tino masomasoa, pei se tamaloa. Ma o se tagata maualuga foi. E fefe fua ai lava le tagata, pe a tilotilo iai. Ua tu’itu’i e Selema le faitoto’a, ae tatala mai e se toeaina pa’e’e, ma lona ulu sinasina. “O oe o Tepa?” “E leai,” o le tali mai lea a le toeaina. “O a’u o Anitele’a. O Tepa, o lo’u uso matua.” Ona liliu lea o le toeaina ma taitai atu Selema agai i totonu o le potu malolo, a’o mulimuli atu i tua ia Lula. “Sole Tepa! O lea e o mai teine ia, mo oe!” o le valaau atu lea a Anitele’a, agai i totonu o le fale. Na ona o’o atu lava o Selema i totonu o le potu malolo, tepa atu i le toeaina o Tepa, ona tu faafuasei loa lea, pei ua vaai i se aitu. O le teine o Lula lea na savali i tua o Selema, ua vave lana gaioi ma oso fa’aautafa, semanu e taia ia Selema, lea ua na’o na tu ma faataupupula atu i le tagata, o lo’o saofai mai totonu o le potu malolo. “Suga, o le a le mea ua tupu? E pei ua e va’ai i se aitu.” O le fesili atu lea a Lula ia Selema. Ae ua na’o na faasino o le lima a Selema, i le nofoa o lo’o saofa’i mai ai Tepa. [E FAIA PEA] Section: Le Lali
2026-06-25 06:49:49