Lənkəranda kanalizasiya sisteminin yenilənməsi işlərinə başlanılıb

Lənkəranda ən ciddi problemlərdən biri – kanalizasiya sisteminin yenilənməsi istiqamətində mühüm addımlar atılır. “Lənkəran şəhərinin su təchizatı və kanalizasiya sisteminin yaradılması” layihəsi çərçivəsində işlərə artıq start verilib. Səttərxan, Tofiq Aslanov, H.Z.Tağıyev və Koroğlu küçələrindən start götürən layihə üzrə tikinti-quraşdırma işlərinin miqyası yaxın günlərdə daha da genişlənəcək. Yaxşı olan həm də odur ki, layihə çərçivəsində asfalt örtüyünün kəsilərək tullantı poliqonuna daşınması, qazılma zamanı yaranan yararsız torpağın kənarlaşdırılması, kommunikasiya xətlərinin köçürülməsi və bərpası, habelə təmir işləri aparılan yolların ərazisində işlər bitəndən dərhal sonra asfaltlanmanın aparılması nəzərdə tutulur. Qeyd edək ki, Lənkəran şəhərinin kanalizasiya sistemi ötən əsrin 50-60-cı illərində cəmi 20 min nəfərin tələbatını ödəmək şərti ilə inşa edilib. Sonrakı dövrdə şəhər və ətraf yaşayış məntəqələrinin əhalisi üç dəfədən çox artdığı üçün köhnəlmiş sistem mövcud tələbatı qarşılaya bilmirdi. Kanalizasiya sisteminin yenidən qurulması şəhər və ətraf ərazilərin inkişafına, əhalinin yaşayış şəraitinin yaxşılaşmasına, ətraf mühitin qorunmasına, bu sahədə mövcud olan problemlərin birdəfəlik həllinə mühüm töhfə verəcək. Aparılan işlər müəyyən müddət rahatsızlıq yaratsa da, sakinlər bunu anlaşıqlı qəbul edirlər. Anlayırlar ki, bu işlər gələcəkdə şəhərin müasir və dayanıqlı kanalizasiya infrastrukturuna qovuşması, onların rahat və sağlam yaşayış şəraiti ilə təmin olunması naminə həyata keçirilir. Seyran CAVADOV, “Azərbaycan”
2026-08-07 08:20:26