ទឹកកខ្វក់ជាង ៧ម៉ឺនម៉ែត្រគូបក្នុង១ថ្ងៃៗត្រូវបានទប់ស្កាត់មិនឱ្យបំពុលប្រភពទឹកធម្មជាតិ និងបរិស្ថាន

ភ្នំពេញៈ ក្រសួងបរិស្ថានបានធ្វើការទប់ស្កាត់ទឹកកខ្វក់បានចំនួន ២ ២៧០ ២៨៥ ម៉ែត្រគូបមិនឱ្យហូរចូលទៅក្នុងប្រភពទឹកធម្មជាតិ និងបំពុលបរិស្ថាន ក្នុងខែកក្កដា ឆ្នាំ២០២៦ ដែលស្មើនឹងជាង ៧៥ ០០០ម៉ែត្រគូបក្នុង១ថ្ងៃ។ ជាមួយគ្នានេះ ក្រសួងបរិស្ថានបាននិងកំពុងគ្រប់គ្រងទឹកកខ្វក់មិនឱ្យបញ្ចេញទៅក្រៅទីតាំងអាជីវកម្មនានាចំនួន ៧៣ ២៣៥ ម៉ែត្រគូប កុំឱ្យប៉ះពាល់ប្រភពទឹកសធារណៈ និងធម្មជាតិនៅទូទាំងប្រទេស។ លទ្ធផលសម្រេចបាននាពេលនេះ កើតចេញពីកិច្ចខិតខំប្រឹងប្រែងរបស់ក្រសួងក្នុងការអនុវត្តច្បាប់ ទប់ស្កាត់ការបំពុលបរិស្ថាន ធានាសុខភាពរបស់ប្រជាពលរដ្ឋឱ្យរស់នៅបានល្អប្រសើរ និងសម្រេចបានក្រោមយុទ្ធសាស្ត្រចក្រាវិស័យបរិស្ថាន លើសសរស្តម្ភទី១ ផ្តោតលើភាពស្អាត (ទឹក ដី មេឃ)។ ក្រសួងបានឱ្យដឹងថា ក្រុមហ៊ុន រោងចក្រ និងសហគ្រាសចំនួន ៦៤ ទីតាំងបានបំពាក់ឧបករណ៍ស្វ័យត្រួតពិនិត្យការបញ្ចេញសំណល់រាវ ដូចមានកំណត់ក្នុង មាត្រា ១៧៨ នៃក្រមបរិស្ថាន និងធនធានធម្មជាតិ។ គិតចាប់ពីខែមករាឆ្នាំ២០២៥ រហូតដល់ ដំណាច់ខែកក្កដា ឆ្នាំ២០២៦ ក្រសួងបរិស្ថាន បានទប់ស្កាត់ការបញ្ចេញទឹកកខ្វក់ ពីក្រុមហ៊ុន រោងចក្រ និងសហគ្រាស សរុបជាង៣៥ លានម៉ែត្រគូប (៣៥ ២៣៥ ០០៣ ម៉ែត្រគូប) [...]
2026-08-06 04:26:54