Граѓани сослушани во полиција за ширење паника дека водата во Скопје има бактерија

Министерот за надворешни работи Тимчо Муцунски синоќа потврди дека неколку луѓе се повикани на информативен разговор во полиција во врска со денеска проширените шпекулации дека водата во Скопје е загадена со бактеријата ешерихија коли. „Како што сум информиран МВР има повикано повеќе лица на информативен разговор и според мене мора да има одговорност за ова што се случува. Не може туку така да споделувате информации и да ширите паника“, рече Муцунски, кој, исто како и Ѓорѓиевски пред него, директно го обвини опозицискиот Социјалдемократскиот сојуз на Македонија (СДСМ) за ширење на лажните информации Вчера попладне две жени кои споделувале објави дека водата во Скопје не е за пиење и има бактерии се повикани во полициска станица, објавија медиуми. Испрашувани биле за тоа кој им ја дал информацијата, зошто ја споделиле иако не ја провериле и кој бил мотивот. Градоначалникот на Скопје, Орце Ѓорѓиевски, вчера на прес-конференцијата обвини дека на социјалните мрежи се шират непотврдени информации кои предизвикуваат вознемиреност, а како последица граѓани почнале масовно да купуваат вода во маркетите. Тој најави дека надлежните институции ќе постапат против оние кои намерно шират лажни информации. Воедно, градоначалникот посочи дека ЈП „Водовод и канализација“ редовно ја испитува водата преку својата лабораторија, која, според него, врши анализи на повеќе локации во Скопје и помага и во други градови. Како пример го наведе Гостивар, каде што лабораторијата во изминатиот период извршила околу 300 анализи. објави Скопје1.мк На социјалните мрежи молскавично се проширија информации дека скопската вода е загадена, поради што мораа да реагираат и властите, а скопскиот градоначалник Орце Ѓорѓиевски и се напи вода од чешма на прес-конференција.
2026-08-13 04:45:00